Ish-kryeministri dhe kreu i Partisë Demokratike, Sali Berisha, deklaroi se nuk ka ndërmend të nxjerrë një kandidat tjetër për postin e Kryeministrit në zgjedhjet parlamentare të vitit 2025, pavarësisht vendimit të Gjykatës Kushtetuese që e la në arrest shtëpie.

Në një deklaratë të fortë, Berisha tha:
“Më pyet ti a do të pranojë Sali Berisha t’i caktojë Edi Rama kryeministrin dhe kryetarin e PD-së? Kurrë, kurrë!”

Berisha shtoi se nuk do të lejojë që ndonjë palë tjetër të ndërhyjë në përcaktimin e drejtimit të opozitës, duke përmendur rastin e rikthimit të tij në krye të PD-së pas largimit të Lulzim Bashës.

“Kur u ktheva? Kur pashë që kryetarin e kishin futur në xhep,” tha Berisha, duke iu referuar ndikimeve të huaja dhe presioneve që sipas tij kishin ndikuar në lidershipin e mëparshëm të PD-së.

Ai gjithashtu kritikoi zgjedhjet e fundit, duke i cilësuar si farsë, dhe bëri thirrje për leximin dhe respektimin e Kushtetutës, si themel për ndërtimin e një procesi demokratik të drejtë dhe të lirë.

Këto deklarata vijnë ndërsa opozita përballet me sfida të shumta dhe Berisha vijon të mbetet një figurë kyçe në betejën politike kundër qeverisë Rama.