Sot, kreu i Partisë Demokratike, Sali Berisha, do të paraqitet në Prokurorinë e Posaçme Kundër Korrupsionit dhe Krimit të Organizuar (SPAK), ku pritet t’i komunikohet zyrtarisht akuza. Berisha ka qëndruar në arrest shtëpie për 256 ditë, që nga 30 dhjetori 2023, kur Gjykata e Posaçme Kundër Korrupsionit dhe Krimit të Organizuar (GJKKO) vendosi masën e sigurisë ndaj tij.
Sipas gazetarit Igli Celmeta, më 21 tetor 2023, për Berishën u vendos masa e ‘detyrimit për t’u paraqitur’, ndërsa për Jamarbër Malltezin u dha arrest me burg, masë e cila më vonë, më 21 nëntor 2023, u ndryshua në arrest shtëpie. Prokurorët që drejtojnë çështjen janë Arben Kraja dhe Enkeleda Minollai.
Çështja e privatizimit të ish-kompleksit “Partizani” ka filluar që në vitin 2008 dhe u përmbyll në vitin 2012. Kjo është hera e dytë që Sali Berisha paraqitet në SPAK, pasi më 23 janar 2024 u thirr për t’u marrë në pyetje, vetëm 24 ditë pasi ishte vendosur në arrest shtëpiak.
