Kreu i Partisë Demokratike, Sali Berisha, ndaloi në një protestë maratonë te ‘Rruga e Shpresës’ për të shprehur shqetësimin e tij mbi pastrimin e parave në Shqipëri, veçanërisht në sektorin e ndërtimit. Ai theksoi se eurot e drogës po çojnë çmimet në nivele stratosferike, duke e bërë të pamundur për qytetarët të blejnë një apartament.

“Eurot e drogës çojnë çmimet në stratosferë, dhe qytetarit i duhet të punojë një shekull për të blerë një apartament,” tha Berisha, duke theksuar se ky fenomen është një rezultat i lidhjeve të forta midis pushtetit dhe krimit.

Berisha apeloi për një luftë të ashpër ndaj krimit dhe trafikut, duke u zotuar se do të luftojë me zero tolerancë për të prishur këto lidhje. Ai gjithashtu vuri në dukje se Tirana është e rrethuar nga “kullat e drogës dhe të korrupsionit”, duke i kërkuar qytetarëve të shqyrtojnë çmimet e apartamenteve që, sipas tij, janë më të shtrenjtat në Europë.

“Çfarë ndodh? Më shumë se 60 mijë apartamente të reja janë bosh, me dry. Kjo ndodh sepse lumejtë e parave të drogës blejnë katet dhe kullat që në themel, duke e çuar çmimin në stratosferë. Kështu, qytetarët e thjeshtë janë të dënuar të mos mund ta blejnë dot një shtëpi në kryeqytetin e tyre,” tha Berisha.

Ai vazhdoi të theksojë se kjo rritje e çmimeve është një pasojë e drogës, korrupsionit dhe krimit. “Kjo është emergjencë. Kjo është një klithmë për betejë, thirrje për betejë, kushtrim për betejë,” përfundoi Berisha, duke kërkuar mobilizimin e qytetarëve për të luftuar këto probleme.