Kryetari i Partisë Demokratike, Sali Berisha, ka përcjellë urimet e tij për besimtarët e krishterë në prag të Krishtlindjes. Ai vizitoi selinë e Sinodit të Shenjtë të Kishës Ortodokse Autoqefale të Shqipërisë në Tiranë, ku u takua me kryepeshkopin Joan.

“Erdha të shpreh urimet e mia, nderimin tim më të madh për kryepeshkopin e Kishës Autoqefale Shqiptare, bashkëpunëtorët e tij dhe besimtarët ortodoksë kudo që janë. Kjo është një ditë e madhe, jo vetëm në historinë e krishtërimit, por edhe në historinë e qytetërimit botëror dhe perëndimor”, tha Berisha pas takimit.

Ai shtoi: “Uroj çdo shqiptar që këtë ditë ta festojë me besim dhe shpresë për Krishtlindje më të mira vitin e ardhshëm. Gëzuar!”