Ish-deputeti demokrat Ervin Salianji ka deklaruar se opozita duhet të bëjë gjithçka për të larguar nga pushteti kryeministrin Edi Rama.

Përmes një postimi në Facebook, Salianji publikoi disa foto nga takimi që zhvilloi me demokratët në Vlora, ku u ndal te situata politike në vend dhe kritikat ndaj qeverisë.

Sipas tij, korrupsioni ka dëmtuar rëndë qeverisjen dhe ka delegjitimuar pushtetin aktual.

“Me demokratët e Vlorës! Korrupsioni e ka kalbëzuar qeverinë, e ka rrënuar moralisht dhe delegjitimuar, na takon ne demokratëve të bëjmë gjithçka për të larguar Edi Ramën”, shkroi Salianji në postimin e tij.

Takimi me qytetarët dhe mbështetësit e opozitës në Vlorë vjen në kuadër të takimeve që ish-deputeti po zhvillon me strukturat dhe simpatizantët demokratë në qytete të ndryshme të vendit.