Një ngjarje e rrezikshme është regjistruar në qytetin e Sarandës, ku një 21-vjeçar është shpallur në kërkim nga policia pas një episodi të dhunshëm dhe kërcënues.

Sipas njoftimit zyrtar, i riu me inicialet M. B., banues në lagjen nr. 3 të Sarandës, akuzohet për veprat penale “Kanosja”, “Shkatërrimi i pronës” dhe “Mbajtja pa leje e armëve të ftohta”. Hetimet paraprake tregojnë se ai ka kërcënuar me thikë shtetasin E. B., 41 vjeç, dhe më pas e ka ndjekur me automjetin e tij, duke i shkaktuar dëmtime mjetit që ky i fundit po drejtonte.

Pamje të këtij incidenti janë shpërndarë edhe në rrjetet sociale, duke shkaktuar shqetësim tek banorët.

Policia njofton se automjeti i përdorur nga autori i dyshuar, Mariglen Bajrami, është sekuestruar, ndërsa vijon puna intensive për kapjen e tij dhe dokumentimin e plotë të ngjarjes.
Materialet i janë referuar Prokurorisë për veprime të mëtejshme ligjore.