Kancelari gjerman, Olaf Scholz, ka bërë thirrje që Kosova dhe Serbia të angazhohen më intensivisht në procesin e normalizimit të marrëdhënieve mes tyre, duke theksuar se ai do të përfshihet personalisht në këtë përpjekje. Këto komente ai i bëri gjatë hapjes së samitit të Procesit të Berlinit, ku ishin të pranishëm përfaqësues të të gjitha vendeve të Ballkanit Perëndimor dhe të vendeve partnere.

“Na duhet një dinamikë e re… Miqve nga Beogradi dhe Prishtina sot u them: Ju lutem mos lejoni që e kaluara t’ju frenojë në rrugën drejt një të ardhmeje paqësore dhe prosperuese. Jam i bindur se kjo e ardhme gjendet në BE dhe ekziston vetëm një rrugë që çon atje: zbatimi i plotë i marrëveshjeve të arritura”, tha Scholz gjatë fjalës hyrëse.

Kancelari gjithashtu shtoi: “Unë do të vazhdoj të angazhohem personalisht me të dyja vendet, për t’u siguruar se ato e shfrytëzojnë këtë mundësi”.

Procesi i Berlinit, i cili ka synim të afrojë vendet e Ballkanit Perëndimor më pranë Bashkimit Evropian, është një platformë ku Kosova, Shqipëria, Serbia, Bosnje e Hercegovina, Mali i Zi dhe Maqedonia e Veriut bashkëpunojnë për të arritur qëllime të përbashkëta. Nga këto gjashtë shtete, Kosova është e vetmja që ende nuk është kandidate zyrtare për anëtarësim në Bashkimin Evropian.