Reperi dhe producenti i njohur Sean Combs, i njohur si P Diddy, është përballur me një tjetër padi për përdhunim, ku viktima e supozuar pretendon se ishte vetëm 16 vjeç në kohën kur ka ndodhur incidenti.

Sipas dokumenteve ligjore të publikuara nga mediat amerikane, një grua anonime ka ngritur një padi për sulm seksual kundër Diddy dhe dy personave të tjerë që, sipas saj, punonin për të në atë kohë. Ngjarja e pretenduar ka ndodhur në vitin 2000, kur viktima ishte një adoleshente dhe po linte punën e saj me kohë të pjesshme në Manhattan.

Në padi thuhet se Combs iu afrua vajzës jashtë një pallati, ku dyshohet se jetonte një nga ish-të dashurat e tij. Ai i ofroi asaj një udhëtim për në shtëpi, duke pretenduar se nuk ishte e sigurt që ajo të ecte vetëm natën. Pasi pranoi ofertën, vajza pretendon se u fut në makinë, por në vend që ta çonin në shtëpi, ajo u dërgua në një vend tjetër.

Sipas pretendimeve të saj, Diddy i dha një pije që e bëri të ndihej e trullosur dhe më pas e sulmoi seksualisht. Viktima gjithashtu deklaroi se punonjësit e tij e transportuan më pas në shtëpinë e saj dhe e lanë pranë hyrjes.

P Diddy u arrestua më 16 shtator në Nju Jork dhe ndodhet në paraburgim. Gjyqi për këtë rast është planifikuar të fillojë më 5 maj 2025.

Avokatët e reperit ende nuk kanë bërë një deklaratë publike për këto akuza. Ndërkohë, kjo është padi e fundit në një sërë akuzash që kanë dalë kundër tij kohët e fundit, duke e vendosur artistin në qendër të një skandali madhor.