Në vizitën e tij të parë në Tiranë, sekretari amerikan i Shtetit, Antony Blinken, shpreh mbështetjen e SHBA-së për reformën në drejtësi. Ai zhvilloi një takim të veçantë me krerët e institucioneve të drejtësisë në vend për t’i inkurajuar në punën e tyre.

Në një postim në media sociale, Blinken theksoi se reforma në drejtësi është thelbësore për Shqipërinë dhe për rrugëtimin e saj europian. Ai gjithashtu përgëzoi luftën e vendit kundër korrupsionit.

“Megjithëse reforma nuk është e shpejtë, e përsosur, apo e lehtë, ky është momenti që institucionet e reja të drejtësisë të veprojnë me guxim ndaj pandëshkueshmërisë dhe të nxisin besimin e publikut në sundimin e ligjit. Këto sfida janë të mëdha, por Shtetet e Bashkuara qëndrojnë fort pas këtyre institucioneve dhe do të mbetemi të palëkundura në mbështetjen tonë”

Ambasada amerikane në Tiranë përshëndeti mbështetjen e sekretarit Blinken për institucionet e drejtësisë në Shqipëri, duke theksuar rëndësinë e veprimeve të tyre në luftën kundër pandëshkueshmërisë dhe në rritjen e besimit të publikut në sundimin e ligjit.

Në takimin e zhvilluar në Tiranë, morën pjesë kryetarët e institucioneve të drejtësisë si Altin Dumani, Holta Zaçaj, Sokol Sadushi, dhe Artur Metani.

“Reforma në drejtësi është thelbësore për Shqipërinë dhe përpjekjet e saj për integrim në BE. U takova me drejtuesit e reformës në drejtësi në Tiranë për të përgëzuar progresin e tyre në avancimin e shtetit të së drejtës dhe luftimin e korrupsionit”, shkruan Blinken.

Blinken theksoi gjithashtu rëndësinë e bashkimit për paqe, duke nënvizuar dialogun si rrugën e vetme për Prishtinën dhe Beogradin.