Ministria e Brendshme e Bullgarisë ka njoftuar një sekuestrim rekord të 206 kilogramëve kokainë në një automjet me targa diplomatike në pikën kufitare mes Bullgarisë dhe Turqisë. Vlera e drogës kap afërsisht 19 milionë euro, duke e bërë këtë konfiskim më të madh ndonjëherë në një kufi tokësor bullgar.

Automjeti tip Land Rover, që po udhëtonte nga Belgjika në drejtim të Turqisë, u ndalua nga autoritetet kufitare bullgare. Ai drejtohej nga një shtetas bullgar dhe në bord ishin edhe një shtetas belg dhe një tjetër nga Republika Demokratike e Kongos, i cili mbante status diplomatik. Burime nga prokuroria kanë bërë me dije se personi me status diplomatik kishte akreditim për Belgjikën, duke nënkuptuar se mund të mos përfitonte imunitet diplomatik në territorin bullgar.

Të tre personat janë arrestuar dhe po hetohen nga autoritetet bullgare, ndërsa rasti trajtohet me prioritet të lartë për shkak të përfshirjes së mundshme të rrjeteve ndërkombëtare të trafikut të drogës.

Ngjarja ka ngjallur shqetësime lidhur me keqpërdorimin e statusit diplomatik për qëllime kriminale dhe ka rritur presionin mbi institucionet evropiane për të forcuar kontrollet dhe për transparencë më të madhe në lëvizjet me status diplomatik.