Policia e Serbisë, në bashkëpunim me Prokurorinë Publike për Krimin e Organizuar, ka sekuestruar pesë tonë drogë të llojit marijuanë në fshatin Konjuh, pranë Krushevcit në Serbinë qendrore, në një nga operacionet më të mëdha të këtij lloji në vend.

Ministri i Punëve të Brendshme, Ivica Daçiç, e cilësoi ngarkesën e kapur si “sekuestrimin më të madh të drogës në histori të Serbisë”, me një vlerë të llogaritur prej 7 deri në 10 milionë eurosh. Gjatë aksionit u arrestuan dy persona, ndërsa një i tretë është ende në kërkim. Të arrestuarit dyshohen për prodhim dhe posedim të paautorizuar të narkotikëve, si dhe për posedim dhe tregtim të paligjshëm të armëve dhe mjeteve plasëse.

Përveç drogës, forcat e rendit gjetën katër pushkë automatike, një raketë që hidhet nga krahu dhe rreth 12,700 euro cash. Sipas Prokurorisë Publike, grupi kriminal kishte magazinuar marihuanën në hapësirat e një kompanie private, nga ku droga do të shpërndahej për shitje në Beograd.

Të dy të arrestuarit janë dërguar në prokurori për pyetje lidhur me aktivitetin kriminal, ndërsa hetimet për të identifikuar dhe arrestuar të tretin vazhdojnë.