Këngëtarja e njohur amerikane, Selena Gomez, zgjodhi Cabo San Lucas në Meksikë për të festuar beqarinë disa javë para martesës me producentin Benny Blanco, që mbahet në shtator. Pas më shumë se tetë muajsh fejesë, artistja 33-vjeçare kaloi disa ditë pushimi dhe argëtimi me mikeshat e saj më të afërta, përfshirë Ashley Cook, Raquelle Stevens, Courtney Lopez dhe kushërirën e saj, Priscilla Marie.
Momente nga festa e beqarisë u ndanë edhe në Instagram, ku Gomez shihet duke shijuar jahtin luksoz, rrezet e diellit dhe pamjet e mrekullueshme të brigjeve meksikane. Në disa foto ajo shihet duke zbritur nga jahti, e veshur me pantallona të bardha dhe çizme kafe, duke tërhequr menjëherë vëmendjen e mediave rozë. Mungesa e Taylor Swift në udhëtim nuk ka kaluar pa u komentuar nga fansat, që nuk i shpëtojnë asnjë detaji të pushimeve të yllit.
