Milan Radoiçiq, ish-nënkryetari i Listës Serbe, i cili ka pranuar organizimin e sulmit terrorist në Banjskë, ende nuk është akuzuar nga autoritetet serbe. Avokati Ivan Niniq thekson se ky proces po shtyhet qëllimisht për të fituar kohë dhe për të ulur presionin ndërkombëtar mbi Serbinë.

“Nuk jam optimist se drejtësia në Beograd do ta procesojë Radoiçiqin. Edhe nëse ndodh, kjo do të jetë në marrëveshje me të. Një situatë ku Vuçiq e lëshon Radoiçiqin për të vuajtur një dënim është e paimagjinueshme për momentin,” tha Niniq për RTK-në.

Pavarësisht se Prokuroria e Lartë në Beograd ka njoftuar më shumë se një muaj më parë ngritjen e një aktakuze, ende nuk ka marrë një vendim. Sipas Niniq, Serbia duhet të marrë përgjegjësi për veprimet e Radoiçiqit nëse dëshiron të bëhet pjesë e BE-së.

Ai shton se Prokuroria e Beogradit nuk ka juridiksion mbi këtë çështje, pasi Serbia ka pranuar juridiksionin e Kosovës me Marrëveshjen e Brukselit. Prandaj, Radoiçiq mund të gjykohet në mungesë në Prishtinë ose të ekstradohet për t’u përballur me drejtësinë.

Sipas Niniq, sulmi në Banjskë nuk do të kishte ndodhur pa dijeninë dhe aprovimin e autoriteteve serbe. “Pyetja është: a do ta zbulojmë ndonjëherë qëllimin e vërtetë të Banjskës?” përfundon ai.