Një haker i sponsorizuar nga shteti kinez ka depërtuar në sistemet e Departamentit të Thesarit të SHBA-së në fillim të këtij muaji, duke arritur të ketë akses në stacionet e punës të punonjësve dhe disa dokumente të paklasifikuara.

Departamenti e cilësoi shkeljen si një “incident të madh” dhe informoi ligjvënësit amerikanë përmes një letre zyrtare. Hetimet për këtë rast janë duke u kryer në bashkëpunim me FBI-në dhe agjenci të tjera të sigurisë kibernetike.

Sipas raportimeve, hakeri përdori një çelës të komprometuar nga një ofrues i shërbimeve të palës së tretë, i njohur si BeyondTrust, një aplikacion që ofron mbështetje teknike në distancë për punonjësit. Departamenti theksoi se nuk ka prova që sugjerojnë se hakeri ka vazhduar të aksesojë sistemet pas zbulimit të incidentit.

Kina ka mohuar çdo përfshirje, duke i cilësuar akuzat si “të pabazuara” dhe duke theksuar se kundërshton çdo formë të hakimit.

Në përgjigje të sulmit, Departamenti i Thesarit po bashkëpunon me Agjencinë e Sigurisë Kibernetike dhe Sigurisë së Infrastrukturës (CISA) dhe ekspertë të pavarur për të vlerësuar dëmin dhe për të përmirësuar masat e sigurisë kibernetike në të ardhmen.