Në ceremoninë e shënimit të pesë vjetorit të Struktures së Posaçme kundër Korrupsionit dhe Krimit të Organizuar, SPAK, diplomatët e lartë amerikanë shprehën mbështetje të fortë për këtë institucion dhe theksuan rëndësinë e vazhdimësisë në luftën kundër krimit të organizuar dhe korrupsionit. Zëvendës-ndihmës Sekretari amerikan i Shtetit, Alexander Kasanof, mori pjesë në ngjarjen në Tiranë dhe e cilësoi SPAK-un si “institucionin publik më të besueshëm në Shqipëri”, duke nënvizuar se është “përpjekja më e suksesshme kundër krimit të organizuar dhe korrupsionit në historinë shqiptare”.

Kasanof bëri thirrje që pas përfundimit të mandatit nëntëvjeçar të prokurorëve të SPAK-ut, t’u mundësohet riaplikimi për të shërbyer përsëri, për të siguruar që lufta ndaj krimit dhe korrupsionit të vazhdojë pa ndërprerje. Ai shtoi se mosrealizimi i këtij ndryshimi mund të dëmtojë përpjekjet dhe të humbasë profesionistët më të aftë në këtë fushë.

Drejtuesi i SPAK-ut, Altin Dumani, i shpallur kampion i luftës kundër korrupsionit nga SHBA-të, kërkoi nga institucionet shqiptare mundësinë e riaplikimit të prokurorëve të posaçëm për një mandat tjetër. Ai e theksoi se, për të mundësuar këtë, janë të nevojshme ndryshime kushtetuese, pasi Kushtetuta aktuale parashikon një mandat të vetëm nëntëvjeçar pa mundësi rizgjedhjeje.

Kasanof theksoi se pavarësia e SPAK-ut është e rëndësishme, por se lufta kundër korrupsionit kërkon një angazhim të përbashkët nga të gjitha institucionet. Ai nënvizoi se arrestimet dhe dënimet që ka realizuar SPAK-u kanë shpërfaqur të paprekshmit dhe kanë treguar se askush nuk është mbi ligjin.

Arrestimet, procedimet penale dhe dënimet tuaja të jashtëzakonshme sikurse i keni parë këtu nga zoti Dumani, bënë që ata që dikur ishin të paprekshëm, të flasin shumë.
Puna juaj frymëzon besimin se prova do të ndiqet brenda kornizës së ligjit pavarësisht se ku, pavarësisht se drejt kujt çojnë hetimet. Asnjë nuk është mbi ligjin”, tha zoti Kasanof.

Reformat në drejtësi dhe rezultatet e SPAK-ut janë, sipas Kasanof, thelbësore për rrugëtimin e Shqipërisë drejt integrimit në Bashkimin Europian.