Policia ka arrestuar këtë të mërkurë 24 persona në Milano për trafikimi droge, prostitucion dhe grabitje. 16 prej tyre ishin shqiptarë, ndërsa 2 ishin nga Italia, 5 marokenë dhe një me origjinë nga Tunizia.

Pas një hetimi të nisur në vitin 2020 në bashkëpunimin e autoriteteve italiane me ato zviceriane, u zbulua baza logjistike e bandës në Milano, ku operonin dy organizata kriminale me kokë grupi shqiptarë. Sipas medieve italiane, banda sillte drogën nga Afrika e Veriut në Itali dhe Zvicër, ku më pas shitej tek konsumatorët.

Gjatë kontrolleve nga njësa antidrogë, u gjetën rreth 42 kilogramë lëndë narkotike ku përfshihej heroinë, kokainë dhe hashash si dhe 40 kilogramë lëndë prerëse. Gjithashtu, u gjetën 2 armë automatike dhe rreth 13 mijë euro cash.

Në përfundim të hetimit, u gjet edhe një apartament dhe një magazinë që përdoreshin si ambjente për kultivimin e drogës, si dhe disa banesa të tjera për ruajtjen e ngarkesave të drogës. Gjithashtu, u zbulua se banda menaxhonte në mënyrë të qëndrueshme një sistem të shfrytëzimit të prostitucionit me vajza nga Evropa Lindore, ku i detyronin me kërcënime me jetë dhe i vinin në dispozicion të klientëve duke përfshirë dhe takimet online.

Të 24 të dyshuarit u arrestuan dhe u dërguan në burgjet përkatëse duke përfshirë Milanon, Bergamon, Leccen, Kremona, Savona dhe Torino. Ndërkohë po punohet për gjetjen dhe sekuestrimin e mijërave tonëve drogë të fshehura nga banda si dhe qindra mijëra euro të ardhura si fitim nga shitja e kokainës.