Autoritetet në Shqipëri dhe Kosovë kanë shkatërruar një rrjet të organizuar trafiku armësh që funksiononte nga Prishtina në Tiranë, dhe ka dyshime se ky grup ka mundur të trafikonte armë edhe për krimin në vendet e Bashkimit Evropian. Hetimet për këtë çështje, të cilat janë nisur nga prokuroritë e të dy shteteve dhe mbështetur nga agjencitë ndërkombëtare si EUROPOL dhe EUROJUST, kanë çuar në ndalimin e 24 personave, me 10 të arrestuar në Shqipëri dhe 14 në Kosovë. Ky operacion i koduar “Çmontimi” është zhvilluar për të frenuar trafikimin e armëve dhe lëndëve narkotike, sidomos kokainës, mes dy shteteve.
Hetimet nisën në fillim të vitit 2024, pas informacioneve operative të grumbulluara nga Seksioni për Hetimin e Trafiqeve të Paligjshme në Drejtorinë Vendore të Policisë Tiranë. Ata kishin dyshime se shtetasi V.O., në bashkëpunim me persona të tjerë, kryente aktivitetin kriminal të trafikimit të armëve të zjarrit nga Kosova në Shqipëri, si dhe trafikimin e kokainës nga Shqipëria në Kosovë. Ky grup, i përbërë nga individë nga Shqipëria dhe Kosova, kishte krijuar një rrugë të ndërlikuar për transportin e armëve, ku një pistoletë shitej për rreth 1 mijë euro.
Gjatë operacionit, janë sekuestruar gjithsej 64 armë, përfshirë pistoleta, armë të gjata, granata dore dhe municione të ndryshme. Po ashtu janë konfiskuar edhe automjete dhe pajisje të tjera teknologjike. Autoritetet theksuan se ky operacion parandaloi përdorimin e këtyre armëve në ngjarje të rënda kriminale.
Në lidhje me këtë çështje, grupi i hetuesve ndërkombëtarë, të udhëhequr nga EUROPOL dhe EUROJUST, kishte nënshkruar një marrëveshje bashkëpunimi me autoritetet e dy shteteve, që mundësoi shkëmbimin e informacionit dhe zhvillimin e operacioneve të shpejta dhe të koordinuara. Gjatë operacioneve të zhvilluara më 10 dhe 11 dhjetor 2024, janë arrestuar edhe 8 persona në Kosovë, të cilët ishin të përfshirë në këtë rrjet kriminal, dhe janë sekuestruar një sërë armësh dhe municionesh.
Duke qenë se ky grup përbëhej nga shtetas nga Kosova dhe Shqipëria, institucionet e dy shteteve nënshkruan në qershor të këtij viti ‘Marrëveshjen për Themelimin e Ekipit të Përbashkët Hetimor’, mbështetur nga EUROPOL dhe nga Projekti i EUROJUST për vendet e Ballkanit Perëndimor dhe midis rajonit dhe BE-së në luftën kundër krimit të organizuar dhe terrorizmit. Nëpërmjet këtij ekipi, autoritetet shqiptare dhe kosovare mundën të bashkëpunonin shpejt dhe lehtë, duke shkëmbyer informacione në kohë reale.
Në vijim të hetimeve, më datë 10.12.2024 rreth orës 21:00 dhe në vijim Policia e Kosovës në funksion të procedimit të përbashkët ka zhvilluar operacione policore ku ndër të tjera janë gjetur dhe sekuestruar: 29 pistoleta dhe 3 armë të gjata të modeleve të ndryshme, 2635 fishekë/municion të modelit të ndryshëm, 2 automjete dhe pajisje tjera TIK. Ndërkohë që gjatë këtyre operacioneve u ndaluan/arrestuan 8 persona. Konkretisht shtetasit V.O., K.K., S.H., Sh.J., A.H., Z.A., A.D., dhe B.A.
Në koordimin me Policinë e Kosovës menjeherë rreth orës 03.00 e në vijim të datës 11.12.2024 nën drejtimin e Prokurorisë Pranë Gjykatës Shkallës Parë të Juridiksionit të Përgjithshëm Tiranë, në funksion të këtij procedimi u zhvillua operacioni për ekzekutimin e urdhrave të ndalimit për 6 persona dhe kontrolli i banesave për 7 vende. Gjatë këtij operacioni u ndaluan për veprat penale “Trafikimi i armëve dhe municionit” e kryer në bashkepunim dhe “Trafikimi i armëve dhe municionit” e kryer në bashkepunim të parashikuar nga neni 278/5/ dhe 278/a/2 i K.Penal të 6 personave:
Euxhenio Manushi, 20-vjeç
Endri Papa, 34-vjeç
Aurel Manreka, 28 vjeç
Gersi Llozha, 22 vjeç
Kleo Muçalliu 26-vjeç;
Tonin Shkambi, 53-vjeç
Gjatë këtij operacioni u sekuestruan 22 armë zjarri ‘Zoraki’, një armë zjarri Ak 47, një granatë dore ofensive dhe 470 fisheke të llojeve të ndryshme. Gjithashtu u sekuestruan edhe 3 automjete dhe shuma të konsiderueshme parash e 10 aparate celulare..
