Një ngjarje tragjike ka ndodhur në Shqipëri, ku një burrë nga Hendon i Londrës ka humbur jetën pas një aksidenti rrugor, teksa kishte ardhur në vend për të marrë pjesë në dasmën e mikut të tij më të mirë.

Viktima, Daniel Rjabcevs, 28 vjeç, kishte udhëtuar drejt Shqipërisë për ceremoninë e dasmës së mikut të tij, e cila është zhvilluar më 6 qershor. Sipas raportimeve nga mediat shqiptare, ai u përfshi në një aksident mes dy automjetesh, një Fiat dhe një Audi, ku tre persona kanë mbetur të plagosur – mes tyre shoferi dhe dy pasagjerë.

Pas përplasjes, Rjabcevs është dërguar në spital, por nuk ka mundur t’u mbijetojë plagëve, konfirmoi vëllai i tij, Vladlens Merkulovs.

Ai tha:

“Gjatë festimeve të dasmës, ai u largua shkurtimisht, ndoshta për të blerë një karikues telefoni nga një dyqan aty pranë, megjithëse kjo nuk është konfirmuar kurrë plotësisht.”

“Pak më pas, ai u përfshi në një aksident të tmerrshëm rrugor në autostradën Fier-Levan pranë një vendi të njohur si Kthesa e Liqenit.”

Në një homazh të publikuar në GoFundMe, vëllai i tij u shpreh:

“Familja jonë është e pikëlluar. Danieli ishte një bir i dashur, vëlla, mik dhe një person që solli mirësi dhe pozitivitet në jetën e atyre që e rrethonin. Humbja e tij ka lënë një boshllëk të paimagjinueshëm në familjen tonë.”

Sipas të njëjtit burim, është hapur edhe një mbledhje fondesh për të mbuluar shpenzimet e funeralit dhe transportimin e trupit nga Shqipëria drejt Letonisë, ku do të prehet pranë familjes.

Rjabcevs punonte si arkitekt i dizajnit të brendshëm në Northbanks Design në Londër dhe kishte lidhje me zona si Harrow dhe Finchley, ku kishte ndjekur edhe shkollimin e tij.