Policia e Shkodrës ka shpallur në kërkim dy shtetas, të cilët akuzohen për transportimin e emigrantëve të huaj me qëllim kalimin e paligjshëm të kufirit. Në vendin e quajtur “Ura e vjetër e Bunës,” autoritetet ndaluan një automjet të dyshuar, por drejtuesi, shtetasi D. L., refuzoi të ndalonte dhe braktisi automjetin, duke u larguar së bashku me bashkëpunëtorin e tij dhe duke lënë emigrantët në vendngjarje.

Policia njoftoi se ka sekuestruar automjetin, 7 celularë dhe një leje drejtimi, ndërsa vijojnë hetimet për kapjen e shtetasve D. L., 23 vjeç, dhe F. H., 50 vjeç, të cilët dyshohet se vepronin në bashkëpunim për trafikimin e 7 emigrantëve të huaj.

Materialet procedurale janë dorëzuar në Prokurorinë pranë Gjykatës së Shkallës së Parë në Shkodër për veprime të mëtejshme në lidhje me veprën penale “Dhënie ndihmë për kalim të paligjshëm të kufirit shtetëror, në bashkëpunim.”