Sabrina Krasniqi, një modele 27-vjeçare me origjinë shqiptare, dyshohet se ka qëlluar për vdekje bashkëshortin e saj, Pajtim Krasniqi, 34 vjeç, para se të vriste veten në banesën e tyre luksoze në Beach Club II Hallandale, Florida. Ngjarja e rëndë ndodhi për arsye ende të panjohura.
Sipas raportimeve të policisë dhe mediave lokale, Sabrina ka qëlluar pesë herë bashkëshortin e saj në ballkonin e banesës, para se t’i merrte jetën vetes. Trupat e pajetë të çiftit u gjetën në katin e 45-të të ndërtesës nga autoritetet që mbërritën pas raportimit të fqinjëve për të shtëna dhe të bërtitura.
Një dëshmitar okular, Max Braedlin, tha për mediat: “Dëgjuam të bërtitura dhe pas tyre të shtëna. Ishte e frikshme. Pak më vonë mbërritën makinat e policisë.”
Brenda banesës u gjetën një arush pellushi, një kuti me trëndafila dhe një zemër simbolike, ndërsa televizori ishte ende i ndezur.
Ngjarja ka tronditur familjen dhe miqtë e çiftit. Motra e viktimës, Albana Krasniqi Munrett, shprehu dhimbjen dhe zemërimin e saj përmes një postimi në rrjetet sociale:
“Gruaja e Pajtimit ia mori jetën me pesë plumba në gjoks. Personi që ai dashuronte dhe i besonte më shumë e tradhtoi atë dhe dashurinë e tij. Kjo ngjarje ka shkatërruar familjen tonë.”
Sabrina Krasniqi, me emrin e vajzërisë Sabrina Dzaferovic, ishte një modele e njohur, e cila kishte pozuar për Inside Edition në vitin 2021. Hetimet për motivet dhe rrethanat e ngjarjes vazhdojnë.
