Punonjësit e Policisë së Shtetit, në rolin zbatues, do të përfitojnë një shpërblim prej 10 mijë lekësh, si pjesë e vendimit të miratuar në mbledhjen e fundit të Këshillit të Ministrave për këtë vit.

Ministri i Brendshëm, Ervin Hoxha, deklaroi se ky shpërblim është një vlerësim për kontributin dhe përkushtimin e efektivëve të policisë në garantimin e sigurisë publike dhe rendit në vend, veçanërisht në një vit të ngarkuar me sfida.

“Qeveria ka vlerësuar dhe vlerëson rolin e Policisë së Shtetit për rritjen e sigurisë, nën vizionin SHQIPËRIA2030. Investimet në teknologji, infrastrukturë dhe logjistikë janë pjesë e këtij vizioni. Ky shpërblim për festat e fundvitit është një formë mirënjohjeje për punën dhe sakrificat e tyre,” – u shpreh ministri Hoxha.

Ministri theksoi gjithashtu se suksesi në garantimin e një sezoni turistik të qetë dhe në luftën kundër krimit të organizuar është meritë e drejtpërdrejtë e angazhimit dhe përkushtimit të efektivëve të Policisë së Shtetit.

Në përmbyllje, Hoxha nënvizoi rolin kyç të policisë në sfidat e vitit të ardhshëm, përfshirë garantimin e zgjedhjeve të lira dhe demokratike, si dhe përballjen me fenomenet kriminale dhe paligjshmërinë.