Një ngjarje tronditëse ka ndodhur në një kompleks shkollor në Indonezi, ku një shpërthim i fuqishëm brenda xhamisë ka plagosur më shumë se 50 persona, shumica nxënës. Mes të lënduarve ndodhet edhe i dyshuari kryesor, një nxënës 17-vjeçar, që dyshohet se solli në shkollë një bombë artizanale.

Sipas autoriteteve lokale, shumë prej të plagosurve kanë pësuar djegie të rënda, ndërsa disa janë në gjendje kritike. Njësitë e emergjencës dhe ekipet për çmontimin e bombave u dërguan menjëherë në vendngjarje për të mbledhur prova dhe për të siguruar që nuk kishte pajisje të tjera shpërthyese.

Një dëshmitar, nxënës i shkollës, ka treguar se kishte parë shokun e tij të sillte në shkollë pajisjen shpërthyese, duke shtuar se ai shpesh ishte bullizuar nga të tjerët. Të tjerë nxënës e kanë përshkruar 17-vjeçarin si “të tërhequr dhe të prirur drejt dhunës”, duke shtuar se shpesh vizatonte imazhe me përmbajtje agresive.

Një punonjëse e kuzhinës së shkollës tha për mediat lokale:

“Pashë tym të bardhë që dilte nga xhamia dhe dritaret e thyera. Zemrat na rrihnin fort, nuk mund të merrnim frymë.”

Autoritetet u kanë bërë thirrje qytetarëve të ruajnë qetësinë dhe të mos nxitojnë të e cilësojnë ngjarjen si akt terrorist, derisa hetimet të përfundojnë. Për momentin, policia po punon për të zbuluar nëse i riu e ndërtoi vetë bombën apo e mori nga një burim tjetër.