Një incident i rëndë ka ndodhur mëngjesin e së hënës në Wimbledon, Londër, ku një furgon shpërtheu në një parking nëntokësor të një qendre tregtare, duke plagosur rëndë shoferin dhe duke shkaktuar panik mes qindra qytetarëve.

Sipas gbnews.com, ngjarja ndodhi në një moment kur qendra tregtare ishte e mbushur me rreth 100 persona, të cilët u detyruan të evakuoheshin menjëherë pasi shpërthimi shkaktoi tym të dendur dhe alarm të përgjithshëm.

Autoritetet e policisë dhe zjarrfikësve raportuan se shpërthimi ka ardhur si pasojë e disa materialeve të ndezshme që ndodheshin brenda furgonit. Për arsye ende të paqarta, çatia e mjetit është përplasur me çatinë e parkingut, duke shkaktuar reagimin zinxhir që çoi në shpërthim. Pamjet nga vendngjarja tregojnë furgonin tërësisht të dëmtuar, me dritare të thyera dhe pjesën e brendshme thuajse të shkatërruar.

Një zëdhënës i Policisë Metropolitane konfirmoi se shoferi, një burrë në të 60-at, ka pësuar djegie dhe është transportuar me urgjencë në spital. Autoritetet janë ende duke hetuar shkaqet e incidentit, ndërsa deri më tani ngjarja nuk dyshohet të ketë lidhje me terrorizmin.

Qendra tregtare mbeti e mbyllur për disa orë, ndërsa hetimet dhe punimet e pastrimit vijojnë.