Pas hetimeve lidhur me shpërthimin e ndodhur pak ditë më parë në Tiranë, në katin e 9-të të një pallati në rrugën “Sadik Petrela”, policia ka konfirmuar se lënda plasëse është hedhur me anë të një droni, i cili gjithashtu ka shpërthyer. Ky shpërthim ka shkaktuar tronditje në zonë, por fatmirësisht nuk ka pasur viktima.

Ende nuk janë identifikuar autorët e këtij akti, por policia është duke kryer ekspertizën e mbetjeve të dronit për të ndihmuar në identifikimin e personave që kanë lëshuar dronin. Hetimet janë intensifikuar për të zbardhur rrethanat e ngjarjes dhe për të gjetur autorët.

Në dëshminë e tij para hetuesve, pronari i apartamentit ka pohuar se ai ia kishte dhënë me qira banesën një çifti dhe se nuk kishte pasur asnjë konflikt. Po ashtu, shtetasja me iniciale E.A., që kishte marrë apartamentin me qira që në fund të korrikut të këtij viti, ende nuk është marrë në pyetje, pasi policia nuk ka mundur ta gjejë. Hetimet vazhdojnë për të zbuluar të plotë rrethanat dhe autorët e këtij akti kriminal.