Shqipëria ka përmbyllur me sukses raundin e dytë të negociatave me Letoninë për marrëveshjen dypalëshe në fushën e sigurimeve shoqërore, duke shënuar një tjetër hap konkret në forcimin e bashkëpunimit mes dy vendeve dhe në procesin e integrimit evropian të vendit tonë.

Takimi u zhvillua në Riga, ku delegacioni shqiptar u kryesua nga zëvendësministrja e Ekonomisë, Kulturës dhe Inovacionit, Olta Manjani, ndërsa pala letoneze nga Ineta Tāre, drejtoreshë e Departamentit të Bashkëpunimit Ndërkombëtar dhe Politikave të BE-së në Ministrinë e Mirëqenies së Letonisë.

Palët arritën dakordësinë për tekstin e marrëveshjes kuadër dhe asaj administrative, e cila synon të garantojë mbrojtje të plotë sociale për qytetarët që punojnë dhe kontribuojnë në të dy vendet, sipas legjislacionit të secilit shtet.

Marrëveshja do të kalojë për miratim në qeveritë dhe parlamentet përkatëse, përpara se të hyjë në fuqi zyrtarisht. Ajo vjen si pjesë e përpjekjeve të Shqipërisë për të siguruar të drejta të barabarta për qytetarët shqiptarë që jetojnë dhe punojnë jashtë vendit.

Me këtë marrëveshje, numri i marrëveshjeve dypalëshe në fushën e mbrojtjes shoqërore të negociuara nga Shqipëria shkon në 21, prej të cilave 13 janë me shtete anëtare të Bashkimit Evropian.