Gjashtë bashki të vendit pa kryetarë, priten zgjedhjet e parakohshme lokale

Gjashtë bashki të vendit ndodhen aktualisht pa drejtues lokalë, ndërsa pritet që Presidenti Bajram Begaj të dekretojë datën e zgjedhjeve të parakohshme.

Pas Beratit, Tepelenës dhe Matit — ku kryebashkiakët Ervin Demo, Tërmet Peçi dhe Agron Malaj do të lënë detyrën për t’u ulur në Kuvend si deputetë të rinj të zgjedhur më 11 maj — boshatisja e karriges së kryetarit ka përfshirë edhe Tiranën, Vlorën dhe Cërrikun.

Në kryeqytet, pas arrestimit të Erion Veliajt më 10 shkurt, kryeministri Edi Rama shpalli kandidaturën e Ogerta Manastirliut për të drejtuar Bashkinë e Tiranës. Në Vlorë, dorëheqja e papritur e Ermal Dredhës ka lënë qytetin bregdetar pa drejtues, ndërsa në Cërrik posti mbeti vakant pasi Andis Salla u emërua ministër i Bujqësisë në kabinetin e ri qeveritar.

Në të njëjtën kohë, Ervin Demo është emëruar ministër i Pushtetit Vendor në qeverinë “Rama 4”, ndërsa Peçi dhe Malaj do të nisin mandatin e tyre të parë parlamentar.

KQZ dhe Presidenca pritet të nisin procedurat për përcaktimin e datës së zgjedhjeve të pjesshme, nga ku qytetarët e gjashtë bashkive do të zgjedhin drejtuesit e rinj.