Pas pesë vitesh nga miratimi i ligjit të parë për tregjet financiare të bazuara në teknologjinë e regjistrave të shpërndarë, i cili nuk u bë kurrë funksional për shkak të mungesës së licencimeve, Shqipëria po prezanton një projektligj të ri “Për Tregjet e Kripto-Aseteve”.

Projektligji parashikon prodhim, blerje, këmbim dhe përdorim të kriptovalutave në përputhje me rregulloret e Bashkimit Evropian, duke krijuar një kuadër të harmonizuar që lejon ofruesit vendas të operojnë në tregun e përbashkët evropian sipas standardeve të larta të mbikëqyrjes dhe transparencës.

Sipas ministrisë së Ekonomisë dhe Inovacionit, rregullat e projektligjit synojnë të garantojnë një mjedis konkurrues për bizneset inovative, tërheqjen e investimeve cilësore dhe fuqizimin e ndërmarrjeve të vogla dhe të mesme. Kripto-asetet do të mund të përdoren edhe si mjet pagese, duke ofruar pagesa më të lira, më të shpejta dhe më efikase, veçanërisht për transaksionet ndërkufitare.

Projektligji garanton gjithashtu të drejtën e qytetarëve jo profesionistë për të tërhequr investimin brenda 14 ditësh nga nënshkrimi i marrëveshjes. Sidoqoftë, adoptimi i këtij kuadri ligjor paraqet edhe sfida të mëdha, kryesisht lidhur me stabilitetin financiar dhe parandalimin e pastrimit të parave.