Kreu i Partisë Demokratike, Sali Berisha, zhvilloi këtë të premte një takim me Departamentin e Burimeve Natyrore, ku fokus kryesor ishte rritja e çmimit të naftës.

I pranishëm në takim, deputeti Enno Bozdo theksoi se Shqipëria është sot vendi me çmimin më të lartë të naftës në rajon dhe akuzoi qeverinë për mungesë vullneti për të ndërhyrë për të mbështetur qytetarët.

“Shqipëria ka naftë më të shtrenjtë në rajon, do të vazhdojë ta ketë dhe kjo do ndikojë edhe te familjet. Dhe qeveria nuk ka asnjë vullnet për të ndërhyrë dhe për të ndihmuar shqiptarët,” tha Bozdo.

Ai u shpreh gjithashtu se rezervat e sigurisë nuk mund të përdoren për të balancuar çmimet në treg për shkak të direktivave të BE-së dhe legjislacionit shqiptar. “Ato hidhen vetëm kur Agjencia Ndërkombëtare e Energjisë bashkëpunon me Komisionin Europian dhe kur nuk ka furnizim. Ndërsa modeli që propozon qeveria, me përfshirjen e sektorit privat, do të krijojë një kosto shtesë prej 300 milion eurosh dhe çmimi i karburantit pas krizës do të jetë më i lartë se më parë,” paralajmëroi Bozdo.

Takimi vjen në një kontekst kur rritja e çmimeve të karburanteve mbetet shqetësim i madh për qytetarët dhe bizneset në vend.