Kryetari i Partisë Demokratike, Sali Berisha, gjatë një takimi me strukturat e PD, denoncoi rritjen e çmimit të naftës në Shqipëri, duke e cilësuar atë më të lartë në botë në raport me fuqinë blerëse të qytetarëve.

“Qeveria në një akt cinik të pashembullt e ka bërë akcizën e naftës të indeksueshme. Nuk jua bën pensionistëve indeksimin e pensioneve. Jo, i mashtron, indekson akcizën e naftës dhe e rrit në përputhje me inflacionin, gjë që jep një rritje të ndjeshme çdo vit dhe rëndon me 40 lekë të vjetra në çmimin e saj,” tha Berisha.

Ai akuzoi qeverinë për keqmenaxhim dhe mashtrime ndaj qytetarëve, duke theksuar se kjo politikë sjell pasoja masive për fermerët dhe për çmimet e transportit e ushqimeve. “Ndëshkim që shkon në miliarda euro, 2.6 miliardë euro. Shkon në pamundësi masive të fermerëve për të paguar mjetet e punës, çmime të larta transporti, rritje të çmimit të ushqimeve, dhe shkon në një cinizëm dhe sharlatanizëm ekstrem,” tha Berisha.

Deklarata e tij thekson tensionin e vazhdueshëm mbi çmimet e karburanteve dhe efektin e tyre në ekonominë e familjeve shqiptare.