Shqipëria është vlerësuar si një histori suksesi në turizëm në takimin e 71-të të Komisionit Evropian të UN Tourism, i mbajtur në Baku, Azerbajxhan. Sipas të dhënave të publikuara në këtë forum, Shqipëria kryeson në Evropë për rritjen e numrit të vizitorëve, me një rritje prej 136% krahasuar me periudhën para pandemisë Covid-19.

Kjo rritje e jashtëzakonshme e vendit në hartën turistike u përshëndet edhe nga Kryeministri Edi Rama, i cili në një postim në rrjetet sociale e quajti këtë rezultat “një tjetër konfirmim ndërkombëtar për suksesin e modelit shqiptar të turizmit”, duke theksuar se modeli ynë mbështetet në “zhvillimin e qëndrueshëm dhe gjithëpërfshirës”.

Shqipëria me të drejta të plota në UN Tourism

Gjatë këtij takimi të rëndësishëm, Shqipëria mori pjesë për herë të parë si anëtare me të drejta të plota në Komisionin Evropian të UN Tourism. Kontributi i saj u reflektua edhe në Deklaratën e Bakusë, ku vendi u përmend për eksperiencën pozitive dhe inspiruese në ndërtimin e një turizmi të qëndrueshëm, të bazuar në ruajtjen e pasurisë natyrore dhe kulturore.

Rama: Shqipëria është një frymëzim

“Shqipëria kryeson sërish në rritjen e flukseve turistike në Europë, me +136% krahasuar me periudhën para-pandemike… Shqipëria ishte aty, jo vetëm për të dëgjuar, por për të ndarë eksperiencën e saj si një histori suksesi që frymëzon,” – shkroi Kryeministri Rama.

Perspektiva

Rritja e jashtëzakonshme e fluksit turistik është një sinjal i fortë për potencialin ekonomik të këtij sektori në Shqipëri. Ky sukses jo vetëm që pozicionon vendin në hartën evropiane të turizmit, por përforcon edhe roli diplomatik të Shqipërisë në forume ndërkombëtare ku diskutohet për turizmin e qëndrueshëm dhe inovativ.

Në vijim pritet që këto zhvillime të reflektohen edhe në rritje të investimeve të huaja, përmirësim të infrastrukturës turistike dhe konsolidim të imazhit të Shqipërisë si një destinacion i klasit të parë në Mesdhe.