Eurodeputetja italiane Ilaria Salis ka komentuar zhvillimet e fundit politike dhe sociale në Shqipëri, duke e cilësuar valën e protestave si një sinjal të fortë pakënaqësie ndaj qeverisjes aktuale.

Gjatë një ndërhyrjeje në Parlamentin Europian, Salis deklaroi se mijëra qytetarë shqiptarë kanë dalë në rrugë për të shprehur kundërshtimin e tyre ndaj politikave që, sipas saj, nuk reflektojnë interesat e publikut.

“Shqipëria është vërtet një model për Europën këtë javë. Shumë njerëz kanë dalë në shesh për të protestuar kundër një qeverie që nuk po mbron interesat e popullit.

Shqipëria nuk është në shitje. Ajo që po shohim nuk është thjesht një lëvizje; është një betejë për sovranitetin popullor. Është një popull që po rimerr të drejtat e tij përballë logjikës dominuese ekonomike të kësaj axhende. Mendoj se Europa duhet ta vëzhgojë me shumë kujdes atë që po ndodh në Shqipëri, sepse kjo është diçka e rëndësishme për Bashkimin Europian. Ky është një popull i gjallë, i aftë të mobilizohet për drejtësi dhe liri”, u shpreh ajo.

Eurodeputetja, e njohur për angazhimin e saj në debatet mbi çështje që lidhen me Shqipërinë dhe zhvillimet në Zvërnec përmes amendamenteve të paraqitura në institucionet europiane, vlerësoi mobilizimin qytetar dhe kërkoi që situata të ndiqet me vëmendje nga Bashkimi Europian.

Sipas saj, ajo që po ndodh në Shqipëri nuk duhet parë thjesht si një protestë e zakonshme, por si një reagim i gjerë shoqëror për më shumë transparencë, drejtësi dhe përfaqësim.