Një akt i jashtëzakonshëm guximi ka bërë që emri i Elton Zefit, 32 vjeç, të jehonojë në mediat italiane. I riu shqiptar u hodh pa hezitim në ujërat e akullta të kanalit Battaglia në Padova, sapo pa një makinë të zhytur me shpejtësi, duke arritur t’i shpëtonte jetën një biznesmeni 85-vjeçar, i cili po rrezikonte të mbytej brenda automjetit të tij.

Giuseppe Salvalajo, sipërmarrës i njohur në zonë, kishte humbur kontrollin e makinës për arsye ende të paqarta. Automjeti u fundos me ritëm të frikshëm, ndërsa i moshuari mbeti i bllokuar, i paralizuar nga shoku. Në atë moment kritik, Elton Zefi – pikërisht ditën e ditëlindjes së tij – u hodh menjëherë në ujë, bashkë me një qytetar tjetër që ndodhej aty pranë.

Fillimisht u përpoqën të thyenin xhamat, por makina nuk hapej. Teksa koha po mbaronte, Zefi dalloi nga sedilja e pasme dorën e të moshuarit, pranë një hapësire ku xhami kishte mbetur pak i çelur. I lodhur, me trupin pothuaj të mpirë nga të ftohtit, ai vendosi ta bënte edhe një përpjekje të fundit — përpjekje që i shpëtoi jetën 85-vjeçarit.

Pak çaste më vonë mbërritën shërbimet e emergjencës, ndërsa i moshuari u transportua në spital dhe ndodhet jashtë rrezikut për jetën. E gjithë ngjarja u filmua nga kalimtarë të rastit dhe videoja u shpërnda me shpejtësi në rrjetet sociale.

Heroizmi i Elton Zefit u vlerësua edhe nga Kryeministrja italiane Giorgia Meloni, e cila shkroi në Instagram:
“Një jetë e shpëtuar falë guximit dhe altruizmit të atyre që zgjodhën të ndërhyjnë. Heronj.”