Një shqiptar i shpallur në kërkim për vrasje është arrestuar në Slloveni, pasi dyshohet se ka vrarë një 46-vjeçar ukrainas në Itali tre muaj më parë. I dyshuari, i cili akuzohet për krime të tjera edhe në Slloveni, u arrestua në Lubjanë më 5 janar 2025. Ai dyshohet se ka qëlluar me dy plumba Vadym Usatyi në “Via Varese” në Saronno, më 27 tetor 2024.

Autoritetet italiane kishin lëshuar një urdhër-arrest ndërkombëtar për të, por për momentin nuk është e mundur të konfirmohet nëse i arrestuari është po ai person që kërkohej, pasi ende nuk janë marrë rezultatet e testeve të gjurmëve të gishtave nga autoritetet sllovene. Sipas informacioneve të fundit, i dyshuari është një kriminel i njohur, me shumë precedentë penalë dhe përdorte dokumente false.