Halle, Gjermani – Një 34-vjeçar shqiptar është shpallur në kërkim ndërkombëtar nga autoritetet gjermane dhe Europoli, si autor i një vrasjeje makabre që tronditi qytetin e Halle-s në vitin 2019.

Shpendi Malo, emri që sot ndodhet në listën e 20 kriminelëve më të kërkuar të Europës, akuzohet për vrasjen brutale të një 27-vjeçari shqiptar, identiteti i të cilit nuk bëhet ende publik.

Sipas Policisë Federale Kriminale të Gjermanisë (BKA), ngjarja ka ndodhur në një zonë të pyllëzuar pranë qytetit, ku Malo dyshohet se e ka goditur viktimën me thikë, duke i shkaktuar vdekjen në vend. Pasi ka kryer krimin, ai ka fshehur trupin në një kanal dhe e ka mbuluar me gjethe, në përpjekje për të eliminuar çdo gjurmë.

Trupi i pajetë u zbulua rastësisht vetëm katër ditë më vonë nga kalimtarë të zonës, ndërsa autori kishte braktisur menjëherë Gjermaninë, duke u zhdukur pa lënë gjurmë.

Prej asaj kohe, Malo rezulton i zhdukur, ndërkohë që ndodhet në listën më të zezë të Europolit, përbri emrave të përfshirë në rrjete të krimit të organizuar, drogë dhe trafik ndërkombëtar.

Autoritetet gjermane dhe ato europiane kanë shpërndarë të dhënat e tij në të gjitha pikat kufitare dhe i kanë bërë thirrje qytetarëve që, nëse kanë informacion për vendndodhjen e tij, të njoftojnë menjëherë policinë.

Vrasja në Halle ngre sërish alarmin për përfshirjen e qytetarëve shqiptarë në vepra të rënda penale jashtë vendit dhe rikthen në fokus nevojën për bashkëpunim të ngushtë ndërinstitucional në luftën kundër krimit të organizuar në Evropë.