Një 50-vjeçar shqiptar, Ervin Shahini, është arrestuar në Korenë e Jugut pasi ishte dënuar me burg të përjetshëm nga Gjykata e Apelit, Tiranë. Operacioni i koduar “Suporti” u finalizua me ndihmën e Drejtorisë së Interpolit, Interpol Seulit, dhe Sekretariatit të Përgjithshëm të Interpolit (Sektori Fugitives Investigative Support (FIS)).

Shtetasi ishte shpallur në kërkim ndërkombëtar për vrasje me dhunë, plagosje, dhe largim të të burgosurit nga vendi i qëndrimit. Veprimet kriminale datojnë që nga viti 1995, kur ai përdorte armë të ftohta (thika) për të kryer vrasje dhe plagosje ndaj taksistëve, duke iu marrë automjetet dhe larguar nga vendi i ngjarjes. Ai kishte arratisur në mënyrë të kundërligjshme gjatë trazirave të marsit të vitit 1997.

Operacioni i arrestimit u zhvillua në kuadër të shkëmbimit të inteligjencës policore dhe bashkëpunimit ndërkombëtar. Pas arrestimit provizor në Korenë e Jugut, procedurat për ekstradim janë duke vazhduar për ta sjellë shtetasin në Shqipëri, ku do të ekzekutohet dënimi i tij me burg të përjetshëm.

Gjatë trazirave të muajit mars të vitit 1997, ky shtetas është arratisur dhe është larguar në mënyrë të kundërligjshme, jashtë Shqipërisë.

Drejtoria e Interpolit, që prej vitit 2015, ka shkëmbyer korrespondenca të shumëfishta me zyrat homologe dhe me agjenci të tjera ligjzbatuese, me qëllim lokalizimin dhe më pas arrestimin provizor të këtij shtetasi, për ta ekstraduar në vendin tonë.

Së fundi, është siguruar informacion se ky shtetas strehohej në Republikën e Koresë.
Nga informacionet dhe verifikimet rezultoi se shtetasi Ervin Shahini përdorte identitetin e një shtetasi tjetër shqiptar, për t’iu shmangur arrestimit.

Interpol Tirana, në bashkëpunim me agjencitë ligjzbatuese dhe me Interpol Seulin, vijojnë punën për ekstradimin e këtij shtetasi, në Shqipëri.