Kreu i Komisionit të Prokurimit Publik (KPP), Jonaid Myzyri, është marrë zyrtarisht nën hetim nga Prokuroria e Posaçme (SPAK), pas dyshimeve për abuzime të rënda me detyrën. Myzyri ka vizituar tre herë SPAK-un brenda një periudhe të shkurtër, ndërkohë që kërkonte edhe një mandat tjetër në krye të institucionit që drejton.

Sipas burimeve të VoxNews, ai dyshohet për shpërdorim detyre në lidhje me tenderin për spërkatjen e mushkonjave, të zhvilluar në vitin 2023 për dezisektimin e zonave urbane dhe bregdetare nga Velipoja në Ksamil. Në tenderin për Qarkun Fier (Loti 5), me fond limit rreth 220 mijë euro, fituese u shpall firma “Egian”, por KPP, në krye me Myzyrin, vendosi skualifikimin e saj dhe i dha tenderin firmës “NRG”, që kishte ofertuar një çmim më të lartë.

KPP argumentoi se firmat me ofertë më të ulët kishin falsifikuar dokumentet, megjithëse nuk kishte asnjë vendim nga organet kompetente që të provonte këtë pretendim. Një nga firmat e skualifikuara, “Egian”, e çoi çështjen në Gjykatën Administrative të Apelit, e cila më 25 korrik 2024 vendosi të shfuqizonte dy vendime të KPP-së dhe urdhëroi rishikimin e fituesit.

Në vend që të zbatonte vendimin e formës së prerë të Apelit, Myzyri refuzoi, duke pretenduar në një letër zyrtare se kishte bërë rekurs në Gjykatën e Lartë dhe se do të priste vendimin e saj për pezullim. Kjo sjellje konsiderohet shkelje e rëndë e ligjit, pasi vendimet e Apelit janë ekzekutive dhe nuk mund të pezullohen automatikisht nga palët.

Ky shpërdorim flagrant i kompetencave ka alarmuar autoritetet, duke çuar në nisjen e hetimeve të thelluara nga SPAK. Ndërkohë, çështja ngre pikëpyetje të mëdha mbi funksionimin e ligjshmërisë në institucionet që mbikëqyrin proceset e prokurimit publik në vend.