Sot në orën 16:00 do të mblidhet Këshilli për Rregulloren, Mandatet dhe Imunitetin për dhënien e autorizimit për arrestimin dhe kontrollin e banesës për deputetin Arben Ahmetaj.

Sipas kërkesës së SPAK, mbledhja e lajmëruar do të zhvillohet me dyer të mbyllura. Deputetit Ahmetaj i është kërkuar nga Kuvendi që të jetë prezent përpara Këshillit, por ky nuk është një detyrim ligjor për të.

Sipas Rregullores së Kuvendit deputeti për të cilin kërkohet heqja e mandatit mund të zgjedhë të jetë i pranishëm vetë ose të përfaqësohet me një avokat. Një opsion tjetër është dhe ai i dorëzimit vullnetar të mandatit nga ana e deputetit Ahmetaj, çka do ta bënte të panevojshme mbledhjen e Këshillit për Rregulloren, Mandatet dhe Imunitetin.

Në këto kushte, Kuvendi e vendos në dijeni SPAK-un dhe i hapet rruga arrestimit të deputetit.

Prej Korrikut të vitit të shkuar, Ahmetaj kur kryeministri e shkarkoi si numrin dy të qeverisë së tij, Ahmetaj është zhveshur dhe nga çdo pozicion drejtues në parti. Ai ishte drejtues politik i qarkut të Vlorës, por dhe në zgjedhjet e fundit lokale nuk u angazhuar nga selia rozë në asnjë zonë elektorale.