Pas vendimit të Gjykatës Kushtetuese që rrëzoi kërkesën e kryeministrit Edi Rama dhe la në fuqi pezullimin nga detyra të zv/kryeministres dhe ministres së Infrastrukturës, Belinda Balluku, ka ardhur një reagim i fortë nga drejtuesi politik i Partisë Demokratike, Belind Këlliçi.

Në një deklaratë publike, Këlliçi e cilësoi vendimin si një moment historik, duke akuzuar drejtpërdrejt qeverinë Rama për korrupsion të thellë.

“Sot u rrëzua qeveria më e korruptuar në Europë!” – deklaroi Këlliçi.

Sipas tij, Gjykata Kushtetuese nuk arriti të mbrojë Belinda Ballukun, duke ia atribuar këtë vendim presionit qytetar, betejës së opozitës dhe vëmendjes ndërkombëtare.

“Gjykata Kushtetuese nuk ja doli të mbrojë të pandehurën Belinda Balluku, kjo falë reagimit qytetar, falë betejës së pandalshme të Partisë Demokratike dhe falë presionit ndërkombëtar,” – u shpreh ai.

Këlliçi shtoi se me këtë zhvillim, edhe kryeministri Edi Rama është politikisht i ekspozuar, duke e konsideruar vendimin si një goditje direkte për kreun e qeverisë.

“Edi Rama mori goditje dhe sot është edhe ai në bankën e të akuzuarve!”

Ai akuzoi Ramën se ka bërë çdo përpjekje për të mbrojtur aferat e tij dhe të bashkëpunëtorëve, por sipas Këlliçit, vendimi i sotëm është një hap i rëndësishëm drejt drejtësisë, edhe pse i vonuar.

“Vendimi i Kushtetueses, me shumë vonesë dhe nën presion, është një hap më afër drejtësisë.”

Në fund të reagimit, Këlliçi paralajmëroi përplasje politike në Parlament dhe bëri thirrje për mobilizim qytetar.

“Nëse Rama rrëzon me votë në Parlament kërkesën e SPAK, demokratëve dhe qytetarëve, na lind detyra ta rrëzojmë me çdo mjet Edi Ramën.”

Ai mbylli deklaratën me thirrjen për pjesëmarrje në protestën e paralajmëruar më 10 shkurt, në Bulevard, duke theksuar se beteja do të vazhdojë “me vendosmëri dhe dashuri për Shqipërinë”.