Rreth 28 mijë nxënës të klasave të 9-a në të gjithë vendin po i nënshtrohen sot provimit të matematikës, pjesë e procesit të vlerësimit kombëtar për përfundimin e arsimit bazë.

Provimi nisi në orën 10:00, ndërsa nxënësit kanë në dispozicion 2 orë e 30 minuta për të plotësuar të gjitha pyetjet e testit. Udhëzimi nga Ministria e Arsimit është që nxënësit të paraqiten në qendrat e testimit që në orën 09:00, për të përmbushur procedurat e nevojshme para nisjes së provimit.

Testi i matematikës zhvillohet në 340 qendra provimi në të gjithë territorin, të cilat administrohen dhe monitorohen nga stafe të kualifikuara nga institucionet arsimore vendore dhe qëndrore. Masat janë marrë për të siguruar mbarëvajtjen dhe standardet e procesit.

Më 30 qershor, nxënësit do të zhvillojnë provimin e fundit, atë të gjuhës së huaj, duke përmbyllur kështu ciklin e testimeve kombëtare.

Rezultatet e këtyre provimeve do të kenë rol vendimtar në përzgjedhjen e shkollave të mesme dhe profileve arsimore që nxënësit do të ndjekin në vijim.

Prindërit dhe mësuesit kanë bërë thirrje për qetësi, fokus dhe përgatitje të kujdesshme në këtë moment të rëndësishëm të rrugëtimit arsimor të fëmijëve të tyre.