Prokuroria e Posaçme Kundër Korrupsionit dhe Krimit të Organizuar (SPAK) ka kërkuar zyrtarisht heqjen e imunitetit dhe arrestimin e zv/kryeministres Belinda Balluku, duke përshkallëzuar ndjeshëm hetimet ndaj saj.

Kërkesa, e firmosur nga kreu i SPAK-ut Altin Dumani, i është dërguar Kuvendit dhe parashikon zëvendësimin e masës aktuale të sigurisë – ndalim daljeje jashtë vendit dhe pezullim nga detyra – me masën më të rëndë, atë të arrestimit. Ky zhvillim vjen vetëm pak kohë pas vendimit të Gjykatës Kushtetuese, e cila e riktheu Ballukun në detyrë, duke e bërë sipas analistëve të pavlefshme strategjinë politike të mazhorancës për ta mbajtur atë në funksion.

Eksperti i kriminalistikës, Ervin Karamuço, i ftuar në një emision televiziv, e cilësoi kërkesën e SPAK-ut si një veprim urgjent, të diktuar nga rreziku i ndërhyrjes në prova dhe nga vijimi i hetimeve.

“Ka pasur një urgjencë pas vendimit të Gjykatës Kushtetuese. SPAK-u e gjykoi që fillimisht ta largonte nga zyra për të mos dëmtuar prova, por tani, me rikthimin në detyrë, është gjetur alternativa tjetër. Hetimi vijon dhe kanë dalë episode të reja. Nuk e prisnim të ndodhte kaq shpejt”, u shpreh Karamuço.

Sipas tij, në institucionin që drejton Balluku ka ende persona që mund të thirren për t’u marrë në pyetje, çka rrit rrezikun e ndikimit në procesin hetimor.

Tashmë, vendimi i radhës pritet nga Kuvendi, ku Këshilli i Mandateve do të shqyrtojë kërkesën e SPAK-ut për heqjen e imunitetit. Vendimmarrja do të përcaktojë nëse Balluku do t’i dorëzohet drejtësisë për arrestim apo do të vijojë të qëndrojë në detyrë, mes presionit të fortë politik dhe institucional.