Kontrolle të mëdha u zhvilluan mbrëmë nga SPAK në bashkëpunim me autoritetet italiane në një godinë luksoze pranë rrugës “Myslym Shyri” në Tiranë.

Sipas burimeve, gjatë operacionit janë ndaluar të paktën 10 persona, ndërsa dy të tjerë janë shpallur në kërkim. Kontrolli u përqendrua në dy kulla të Tiranës, të dy të lidhura me aktivitetin e dyshuar të call-centerave që operonin jashtëligjshëm.

Hetimi filloi pas një kërkese nga Antimafia Italiane, e cila identifikoi bazat e aktivitetit në kryeqytet dhe kërkoi bashkëpunimin e Prokurorisë së Posaçme. Operacioni u krye me vendim të Gjykatës së Posaçme për Krimet e Rënda (GJKKO), firmosur nga prokurori Vladimir Mara.

SPAK po vijon hetimet për lidhjet e këtij aktiviteti me shtrirje ndërkombëtare, ndërsa autoritetet shqiptare dhe italiane punojnë për të dokumentuar të gjitha provat e mundshme dhe për të zbuluar të gjithë personat e përfshirë.