Prokuroria e Posaçme Antikorrupsion ka lëshuar fletëthirrje për ish-kryeministrin Sali Berisha për tu paraqitur në SPAK dhe të japë deklarata lidhur me katër vrasjet gjatë protestës së 21 janarit.

Gazetari Enton Abilekaj, në një studio televizive, vlerësoi se procesi hetimor do të jetë shumë i vështirë, pasi shumë prova janë zhdukur gjatë viteve. Ai theksoi se dëshmia kryesore mbetet ajo e Lulzim Bashës, ministër i Brendshëm në atë kohë, ndërsa shtoi se personi që ka fshirë serverat e rëndësishëm për hetimin është gjithashtu anëtar i partisë së Bashës.

“Kanë kaluar 14 vjet dhe shumë prova janë zhdukur. Edhe audioja e gjetur për urdhrin për të qëlluar nuk përcakton qartë se kush e dha urdhrin dhe kush veproi,” tha Abilekaj. Ai theksoi se, edhe pse Gjykata e Strasburgut e ka cilësuar ngjarjen si krim shtetëror, SPAK është detyruar nga Gjykata e Lartë të ndërmarrë hetimin, duke përfshirë zyrtarët e lartë.

Gazetari shtoi se identifikimi i autorëve dhe i urdhëruesve mbetet sfidues: “Të gjithë gardistët që kanë qëlluar pas urdhrit mund të arrestohen, por të kuptosh kush ka dhënë urdhrin është shumë më e vështirë, sidomos duke pasur parasysh se dëshmia kryesore është e Lulzim Bashës dhe personi që fshiu serverat është në partinë e tij.”

Abilekaj përfundoi duke theksuar se, për momentin, Berisha do të thirret si person në dijeni, ndërsa roli i tij si i pandehur do të përcaktohet më vonë gjatë hetimeve.