Spanja ka bërë të ditur një masë të re fiskale që mund të ndryshojë rrënjësisht tregun e pasurive të patundshme në vend. Kryeministri Pedro Sánchez ka njoftuar planin për vendosjen e një takse deri në 100% për blerjet e pasurive të patundshme nga qytetarët që nuk janë rezidentë të Bashkimit Europian, përfshirë këtu edhe shtetasit e Mbretërisë së Bashkuar.

Sánchez e quajti këtë masë “të paprecedent” dhe argumentoi se ajo është jetike për të adresuar krizën e strehimit në Spanjë. “Nuk mund të lejojmë krijimin e një shoqërie të ndarë, ku të pasurit janë pronarë, ndërsa të varfrit mbeten qiramarrës,” tha ai gjatë një deklarate për mediat.

Statistikat tregojnë se vetëm në vitin 2023, rreth 27,000 pasuri janë blerë nga qytetarë jo-rezidentë të BE-së, kryesisht për qëllime investimi dhe jo për banim. Kryeministri nënvizoi se ky fenomen ndikon negativisht në ofertën e strehimit për qytetarët vendas dhe kontribuon në rritjen e çmimeve.

Aktualisht, të huajt jo-rezidentë paguajnë një taksë prej 6-10% të vlerës së pasurisë, varësisht nga rajoni. Propozimi i ri synon të rrisë ndjeshëm këtë nivel, duke e bërë më pak tërheqëse blerjen e pronave nga qytetarët jashtë BE-së. Megjithatë, detajet e plota për implementimin dhe afatin kohor nuk janë bërë ende publike, pasi qeveria po zhvillon studime shtesë për këtë çështje.

Ky propozim pritet të paraqitet për miratim në parlament, ndërsa opinioni publik dhe ekspertët e ekonomisë po diskutojnë për efektet që kjo taksë mund të ketë në tregun spanjoll të pasurive të patundshme dhe ekonominë në përgjithësi.