Pas akuzave të kreut të Grupit Parlamentar të PD-së, Gazment Bardhi, lidhur me shtyrjen e seancës plenare të 12 qershorit, ka reaguar kryeparlamentarja Elisa Spiropali. Ajo mohoi kategorikisht që seanca të jetë shtyrë për shkak të pjesëmarrjes së saj në Samitin për Ukrainën, siç u pretendua nga opozita.

“Nuk u shty seanca për pjesëmarrjen time në samitin në Ukrainë. U shty sepse shumë deputetë kishin mungesa për shkak të aktiviteteve të tjera,” deklaroi Spiropali.

Ajo theksoi se prezenca e saj në Kuvend është e zëvendësueshme nga nënkryetarët Bledi Çuçi ose Agron Gjekmarkaj, duke shtuar se vendimmarrja për shtyrjen ishte bërë në funksion të garantimit të mbarëvajtjes së punimeve parlamentare.

“Kryetari i Kuvendit ka për detyrë të sigurojë mbarëvajtjen e seancave dhe kushtet që të gjithë deputetët të jenë të pranishëm në Kuvend,” përfundoi ajo, duke i cilësuar deklaratat e Bardhit si spekulime për konsum politik.