Normat e obezitetit janë dyfishuar në mbarë botën që nga viti 1990, me mbi 2.5 miliardë persona që konsiderohen mbipeshë ose obezë. Deri në vitin 2050, pritet që më shumë se gjysma e të rriturve dhe një e treta e fëmijëve të jenë mbi nivelin normal të peshës.

Por një studim i ri nga Instituti Kombëtar i Zemrës në Varshavë, Poloni, ka identifikuar një tjetër faktor rreziku: martesën. Studiuesit analizuan të dhënat e 2,405 personave me një moshë mesatare 50 vjeç dhe zbuluan se meshkujt e martuar janë 3.2 herë më të rrezikuar nga obeziteti sesa meshkujt beqarë. Për gratë, ky fenomen nuk u vërejt në të njëjtën shkallë, por të gjithë të martuarit kishin një rrezik më të lartë të mbipeshës (62% për meshkujt dhe 39% për femrat).

Pse meshkujt shtojnë peshë pas martesës?

Studime të mëparshme, përfshirë një studim kinez (2024), kanë treguar se BMI rritet gjatë pesë viteve të para të martesës për shkak të një marrjeje më të lartë të kalorive dhe më pak aktiviteti fizik. Sipas këtij studimi, meshkujt e martuar kanë një përqindje më të lartë mbipeshë (+5.2%) dhe obezë (+2.5%) krahasuar me beqarët. Po ashtu, hulumtimet nga Universiteti i Bath-it treguan se burrat e martuar peshojnë mesatarisht 1.4 kg më shumë se bashkëmoshatarët e tyre beqarë.

Faktorë të tjerë që ndikojnë në shtimin e peshës

Përveç martesës, mosha ka një ndikim të madh: çdo vit shtesë rrit rrezikun e mbipeshës me 3% te meshkujt dhe 4% te femrat, ndërsa rreziku i obezitetit rritet me 4% te meshkujt dhe 6% te femrat.

Ndërkohë, gratë janë më të rrezikuara nga obeziteti nëse:

• Vuajnë nga depresioni

• Kanë nivele të ulëta arsimore

• Jetojnë në komunitete më të vogla

Faktorë të tillë nuk ndikojnë në të njëjtën mënyrë te burrat, sipas studimit.