Një stuhi e fortë ka përfshirë Shtetet e Bashkuara, duke shkaktuar deri tani 42 viktima dhe duke prekur rreth 200 milionë banorë. Të vdekurit janë regjistruar në Nju Jork, Arkansas, Kansas, Luiziana, Masaçusets, Misisipi, Nju Xhersi, Ohio, Pensilvani, Teksas dhe Karolina e Jugut.

Shtresat e borës kanë arritur deri në 40 cm në disa zona, ndërsa rreth 20,000 fluturime janë anuluar për shkak të kushteve ekstreme. Më shumë se 448,000 konsumatorë mbeten ende pa energji elektrike, kryesisht në Tenesi (147,373) dhe Misisipi (128,462), sipas të dhënave të platformës së monitorimit “PowerOutage”.

Shërbimi Kombëtar i Motit paralajmëron se disa shtete të prekura mund të përballen me periudhën më të gjatë të të ftohtit në dekada, duke theksuar rrezikun e vazhdueshëm për jetën dhe sigurinë e banorëve.