Pas një seance maratonë që zgjati rreth 18 orë, Kuvendi i Shqipërisë miratoi ndryshimet në Kodin Penal. Amendamentet u votuan me 85 vota pro nga mazhoranca, ndërsa 9 deputetët e pranishëm të opozitës votuan kundër.

Ministri i Drejtësisë, Besfort Lamallari, e cilësoi miratimin si një hap të rëndësishëm në forcimin e shtetit të së drejtës dhe rritjen e sigurisë publike. Sipas tij, ndryshimet synojnë të adresojnë problematika të ndjeshme si kontrolli i territorit, pastrimi i parave, trafikimi i qenieve njerëzore dhe terrorizmi, si dhe të përmbushin detyrimet që rrjedhin nga procesi i integrimit në Bashkimin Evropian, përmes përafrimit me shtatë akte kyçe të acquis communautaire.

Gjatë debatit parlamentar u rrëzua kërkesa e deputetes së opozitës, Jorida Tabaku, për dekriminalizimin e plotë të shpifjes dhe fyerjes për të gjithë qytetarët. Kreu i grupit parlamentar të Partisë Socialiste, Taulant Balla, e cilësoi këtë propozim si një veprim politik, duke deklaruar se do të përbënte një amnisti për kryetarin e Partisë Demokratike, Sali Berisha, ndërsa theksoi se përjashtimi për gazetarët është parashikuar.

Miratimi i ndryshimeve ka shkaktuar debate të forta politike, me opozitën që shprehet kritike ndaj përmbajtjes së tyre dhe mënyrës së votimit në Kuvend.