Policia e Kosovës ka njoftuar se të martën, pak para mesnatës, stacioni policor në Zveçan ka qenë objekt i një sulmi, pasi persona të panjohur hodhën dy granata dore në drejtim të oborrit të stacionit. Sipas Policisë, sulmi ka shkaktuar dëme materiale, por nuk ka pasur të lënduar.

Në lidhje me ngjarjen, prokurori i Shtetit është njoftuar dhe ka udhëzuar që rasti të iniciohet si “shkaktim i rrezikut të përgjithshëm”, sipas njoftimit të Policisë së Kosovës.

Ky incident ka ndodhur pas një aktiviteti të kryeministrit të Kosovës, Albin Kurti, që shpalli se po ndërtohej një nënstacion i ri policor në fshatin Izvor të Zveçanit, një zonë e banuar kryesisht nga serbë. Kurti gjithashtu njoftoi se disa ditë më parë ishte vendosur një gurthemel për një stacion të ri policor në afërsi të urës së lumit Bistrica, e cila ndodhet pranë kalimit kufitar të Jarinjës.

Përfaqësuesit e komunitetit serb kanë kundërshtuar ndërtimin e këtyre stacioneve policore, duke argumentuar se ato janë një burim presioni dhe diskriminimi ndaj tyre nga ana e Policisë së Kosovës. Po ashtu, ata kërkojnë vëmendje nga komuniteti ndërkombëtar për sjelljen e Policisë së Kosovës, që sipas tyre është “joprofesionale” dhe “politizuar”.

Drejtori i Zyrës për Kosovën në Qeverinë e Serbisë, Petar Petkoviq, e ka vlerësuar ndërtimin e këtyre stacioneve si një mjet shtesë për shtypjen dhe dëbimin e popullatës serbe nga territori i Kosovës. Ai ka theksuar gjithashtu se autoritetet e Kosovës kanë ndryshuar “në mënyrë të dhunshme” strukturën etnike të policisë në veri dhe ka bërë thirrje për respektimin e Marrëveshjes së Brukselit, që parashikon dislokimin e policëve nga radhët e komunitetit serb në këtë rajon.

Në vitin 2022, mbi 500 policë serbë dhanë dorëheqjen nga institucionet e Kosovës pas një vendimi të Qeverisë së Kosovës për ndryshimin e targave të makinave, çka ka çuar në tensione të vazhdueshme në veri të Kosovës, duke kulmuar me një sulm të armatosur ndaj Policisë së Kosovës në shtator 2023, që çoi në vrasjen e një polici. Pas këtyre ngjarjeve, në veri janë dërguar kryesisht pjesëtarë të Policisë së Kosovës nga komuniteti shqiptar dhe njësitë speciale.