Doha / Tel Aviv – Pas sulmeve ajrore izraelite mbi një ndërtesë në kryeqytetin e Katarit, Doha, zyra e kryeministrit Benjamin Netanyahu ka reaguar me një deklaratë zyrtare, duke theksuar se operacioni ishte tërësisht i pavarur dhe i drejtuar nga Izraeli.

“Veprimi i sotëm kundër krerëve kryesorë terroristë të Hamasit ishte një operacion tërësisht i pavarur izraelit. Izraeli e nisi, e drejtoi dhe merr përgjegjësi të plotë,” – thuhet në deklaratë.

Operacioni, që sipas mediave izraelite mban emrin e koduar “Atzeret HaDin” – që përkthehet si “Dita e Gjykimit” – synonte të godiste udhëheqjen e Hamasit që, sipas autoriteteve izraelite, ndodhej në Doha.

A ka SHBA-të rol në sulm?

Raportimet e Channel 12 dhe mediave të tjera izraelite sugjeruan se SHBA-të ishin të informuara dhe madje Presidenti Donald Trump ka dhënë “dritën jeshile” për operacionin.

Megjithatë, zyra e Netanyahut mohoi çdo përfshirje të drejtpërdrejtë amerikane, duke theksuar se Izraeli ka vepruar i vetëm. Deri tani, Shtëpia e Bardhë nuk ka dhënë një deklaratë zyrtare mbi këtë çështje.

Hamasi reagon: “Lajmet për eliminimin tonë janë të rreme”

Nga ana tjetër, Hamasi ka mohuar se delegacioni i tij në Katar është eliminuar, duke deklaruar se “asnjë nga udhëheqësit nuk është vrarë”.

Por burime të ndryshme ndërkombëtare raportojnë për të paktën tre drejtues të Hamasit të vrarë si pasojë e goditjes.

Situata në Katar

Ndërkohë, Ambasada amerikane në Doha ka lëshuar një urdhër strehimi për qytetarët amerikanë, duke i kërkuar të qëndrojnë në vende të sigurta dhe të ndjekin kanalet zyrtare për përditësime.

Autoritetet qatari nuk kanë reaguar ende zyrtarisht, ndërsa tensionet rajonale po rriten ndjeshëm pas këtij operacioni.