Faqja në Telegram, e cila pretendohej se ishte nën kontrollin e hakerave “iranianë”, ka shkaktuar shqetësim sot duke publikuar një listë me mijëra emra të qytetarëve shqiptarë. Në këtë listë përfshihen të dhëna të ndjeshme si numrat e kartave të identitetit, emrat, mbiemrat, vendet e lindjes dhe banimit, si dhe numrat e telefonit.

Ky incident vjen pas një sërë sulmesh kibernetike të pretenduara të realizuara nga hakerat iranianë ndaj institucioneve të Shqipërisë. Sulmi më i fundit u krye ndaj faqes së Institutit të Statistikave (INSTAT), por autoritetet shqiptare kanë bërë të ditur se të dhënat e Censit nuk u prekën.

Këto zhvillime kanë rritur shqetësimin për sigurinë kibernetike dhe mbrojtjen e të dhënave personale të qytetarëve shqiptarë, si dhe sjelljen dhe përgjigjen e institucioneve ndaj sulmeve të tilla.